D’Antwort wo mir dir gern würed geh:

Absolut und sehr gern. D’Alisha langwilt sich uf ihrere Reis unglaublich fest und isch au scho drü mal fertig demit, d’Sandchörnli nach Farbskala z’sortiere. D’Julia schwänzt für so Afrage gern ihres Studente da-si, d’Andrea hät näbed de Masterarbet würklich au nöd de Huufe z’tue und ich sälber bi au bekannt defür, das Langwili min zweite Vorname isch (quasi Fabienne Langwili Humpty). Ihr chönd eu also vorstelle das bi eus im Admin-Team en unglaubliche Tumult usbricht, wänn mir sotig Afrage bechömed. Wär dörf sich als nöchsts drum kümmere? (Spoiler Allert: Als Chefin überstimm ich all mit mim Rägeboge-Chueche-Stimmrächt und gwünn die Debatte IMMER!) #luckyme

Aber nei, jetzt mal im Ernst:

Mir händ scho paar mal drüber gredet, öb mir sotig Korrekture sötted im Abo abüte. Quasi ganz im Sinn vo “Black-Friday Special Deal: 10 Korrekture für en wahnsins Schnäpplipris vo 225.50. Schiess uf eusi AGB’s und lahn eus din Sportsnow-Account verwalte”. Mir händ aber für die allgemein besser Übersicht äxtra SportsNow igrichted (und zahlt), dass alli jederziit en Übersicht über ihri Abodetails händ (z.B. wie lang s’Abo no gaht, wänn de nächst itreiti Termin isch und, und, und…) SportsNow isch mit de Desktop-Asicht unglaublich sälbsterchlärend und mit 2-3 eifache Klicks schafft das au ä nöd so technik versierti Person. Söted ihr aber glich mal nöd witer wüsse, hälfed mir eu logischerwis jederziit gern witer. I de Zwüschedziit lahn ich aber mis Team witerhin Projekt bearbeite, wo euses Agebot in Zuekunft für eu versüesst, es sei denn de special Deal hät dich grad agsproche?

D’Antwort wo mir dir gern würed geh:

Natürlich, ganz nach em Motto “en beteubte Körper isch en glückliche Körper” wür ich profilaktisch -au ohni Schmerze- eifach mal 1gr Dafalgan hindere jätte. Wänds jetzt absolut effizient wetsch gstalte, chöntsches sogar mit zwei, drü Shots Huestesaft oder Schnaps abespüele und by the way, zuesätzlichi sächs Flector Pflaster wod random uf din Körper chläbsch träged erheblich zum modische Erschinigsbild bi. Sicher isch sicher und eures Wohlergehe, sowie Glück liit eus unglaublich fest am Härze. Drum: ja eh, go nuts. Hau ine!

Aber nei, jetzt mal im Ernst:

Mir sind natürlich nöd glernti Medizinerinne und bi (vorallem chronische) Schmerze empfehled mir eurä Doktermänsch z’kontaktiere. Ä Fachperson chan besser abschetze, wie sich d’Inahm vo Schmerzmittel binere Sporteinheit uf eure Körper uswirkt und öbs sinnvoll isch. Grundsätzlich empfehled mir aber nöd eure Körper z’beteube, wänner sich offesichtlich gäge (ä spezifischi) Bewegig wehrt. En Schmerz isch es Warnsignal vo ihm zum ä spezifischi Aktivität z’stoppe. Basicly schreit er nach Rue, damits schlussendlich nöd zu strukturelle Schäde chunt. Ä Verminderig vom Schmerzempfinde füert dementsprächend nur zumene höchere Verletzigsrisiko und wär basicly, as würeder beid Zeigfinger id Ohre stopfe und lut “lalalaa” singe, daser de Protest vom Körper nöd münd ghöre! Chamer mache…söt mer aber nöd!

D’Antwort wo mir dir gern würed geh:

Absolut nöd, mir känned das alli, Da stahsch i Trainingsklamotte ready uf de Tanzflächi, aber uf das Warm-Up häsch würklich kei Lust. I dene Moment chum ich amel au eifach 20 min später is Studio und überspring s’Iwärme und s’Vorbereite vo mim Körper uf d’Trainingseinheit. Schliesslich isch Pole ja gnueg sträng und wänd denn schnell dini Kombinatione aberatterisch, chunsch ämel ja au is schwitze. Mir händ also völlig Verständnis, wänn das öpper nöd möcht und finded, jede sel so wie si möcht! Zudem bringt ja au sones 5 min zspats Ineschneie frische Wind id Gruppedynamik. Für mich als Trainerin isch das ungemein spannend zum abwarte und mich wundere, wär das es na schafft oder weles Füdli ich dörf vermisse.

Aber nei, jetzt mal im Ernst:

Natürlich freued mir eus nöd zwingend über Verspätige, am liebste hämmers, wänner 5 min vor Trainingsbeginn umzoge, parat ufem Mätteli hocked. Mir bereitet eusi Stunde jewils im Vorhinein vor und stimmed s’Warm-up explizit uf de Trainingsplan ab. Bi Verspätige händ mir müse feststelle, dass gwüssi Näsli eifach 10 min später mitmached, ohni Mobilisation oder Cardioeinheit im Vorhinein. Mir händ absoluts Verständnis, dass i Murphy-Moment zum Stau dur de Gubrist, au na de Traktor umgheit und si, zur Fiir vom Tag, s Altersheim über d Strass lönd. Lueged aber doch bitte, söts mal dezue cho, das ihr eu sälber SUBER ufwärmed (heisst zerst Mobilisiere, dänn de Puls ufejage und sich denah um die wichtige Körperstelle kümmere – vorallem Schultere). Söted ihr dadezue Inspiration bruche, fröged eifach d’Trainerin, ich bin mer sicher alli Teammitglieder vo Humpty 7 sind kreativ gnueg, spontani Idee zliefere.

D’Antwort wo mir dir gern würed geh:

Ja aber klar, du döffsch dich sowohl eusem Agebot, als au eusne AGB’s und sowieso ah sämtliche Funktione vom Sportsnow wiedersetze. Mir planed sämtlichi Ressource sowieso nöd ih und entscheidet meistens ganz spontan, nach Lust und Luune öb en Kurs duregfühert wird. Mir hend eus bim Ufbau vo dene Kürs nüt überleit, es hät also null Strategie i eusere Planig. Siebe isch halt eifach mini Lieblingszahl. Si isch sowohl ä Primzahl, es git 7 Zwerge bi Schneewittchen, en Regeboge het 7 Farbe, e Wuche hät 7 Täg und so hät halt au euses Abo au eifach 7 Lektione. Und es wird no besser… falls du die 7 Kürs eifach nöd bezieh willsch, dänn händ mir ä Lösig parat: Wännd nämli lieb frögsch (und bitte seisch) chasch eifach im Migros näbed em Studio die nöd iglöste Stunde gege es Stuck Brot itusche. WIN – WIN

Aber nei, jetzt mal im Ernst:

Fürs Plane vo de Kürs und s’Schriebe vo de AGB’s händ mir richtig viel Zit investiert. Darum möchtet und chönt mir au kei Usnahme mache für Schüeler*inne, wo lieber es flexiblers oder chlinners Abo hätted. Darum nei, mer cha die 7x nöd unghindert flexibel bezieh. Es 7ner-Abo bedütet, dass mer sich für e regelmässig wiederholendi Lektion ischriebt. Möglich isch de Wuchetag selber im Sportsnow z’verschiebe, sötts eim plötzlich am Dsistig besser gah als am Dunnstig. Zudem chan mer sich sälbstständig via Sportsnow bis 4 Stund vor Kursbeginn abmelde und hätt s’Arecht die verpassti Lektion innerhalb vo AGB deffinierter Frist nazhole.

D’Antwort wo mir dir gern würed geh:

Als aller erst, herzliche Glückwunsch! Du hesch definitiv vieles richtig gmacht im Läbe, wenn dus gschafft hesch dies Home Office ah sunnige Täg an See z’verlege. Natürlich möchte mir als Humpty 7 dir nöd im Weg stah uf de Suechi nach de nächste schöne Location für en gmüetliche remote Tag. Euses Studio isch mit de gmüetliche Sofaecke und em Hochtisch optimal usgleit für dis Vorhabe. Chline Tipp am Rande: Sötsch du wele i dine Pause gmüetlich en Film luege, verbind dich doch eifach rasch mit em Samsungflip, legg der d’Matte parat und schnapp der im Migros näbedzue ä Packig Popcorn! Wännd währenddesse merksch, das no öppis fählt, eifach rasch mälde, mir investiered gern ine fancy Kafimaschine zum dir din Arbetsalltag z’versüesse!

Aber nei, jetzt mal im Ernst:

Eigentlich möchte mir eusne Birdies fast jede Wunsch erfülle. Darum staht de Innhaberine vom 24/7-Pass au nüt im Wäg, dass sie au mal en Home Office Tag im Studio verbringed. So ganz ungstört isch mer aber waschinli denn doch nöd. Immerhin flüged au anderi Birdies inne, es findet Privatstunde statt oder süstigi Arbeite wie Reinigungsgspäss. Darum so en ganz stille Ort isch euses Paradies denn doch nöd und wännd viel Meetings häsch, empfiel ichs dir darum nöd.

Grundsätzlich dörfsch du aber als Inhaber*in vom 24/7 Pass dis Home Office is Studio verlegge. Ich weiss #unglaublich !!

D’Antwort wo mir dir gern würed geh:

Äh, tschuldigung?! s’Motto bi eus isch «je knapper s’Ouftit desto glücklicher d’Trainerin» (und möglicherweis au d’Kursteilnehmerinne). Darum gits bi eus ä Maximum-Regle a Stoff wo akzeptieret werde mues. Die Skala gaht ganz logisch vo “komplett blank” bis maximal “Brazilian-Bikini und Bandeau-Top”. Mir händ ja schliesslich nöd umesust (uf Wunsch vonere Besorgte Griffeseenerin) eus Vorhäng zuetah und  möchted jetzt de neu gwunnig Freiruum komplett usnutze, ganz nach em Leitsatz “freii Nippel sind glücklichi Nippel”

Aber nei, jetzt mal im Ernst:

Obersti Priorität het bi eus im Training, dass jedi Nase sich wohl fühlt. Somit dörf selbstverständlich jedi im Outfit ufkrüze, wo si will. Es git kei Chleidervorschrifte, aber spötistens nach em Ufwärme, wenn dini Hut dir sött dä Halt ade Stange ermögliche, wird klar: es bizli Ärm und Bei z’zeige, würd scho Sinn ergeh.. aber ja.. #youdoyou

D’Antwort wo mir dir gern würed geh:

Oh Goodie, was für ä tolli Frag! Lahs mich dir ä Liste geh, vo de 5 wichtigste Objekt, wo du zwingend sötsch mit is Training neh:

☆ Schwümmflügeli oder optional, dis liebste, ufblasbare Schwümmdingsbums z.b. in Form vonere XXL Gummiänte, zum in Flow cho
☆ En Iispickel zum I schwierige Situatione und Gruppezämestellige s IIs z’bräche
☆ Ä Portion Geissechäs vo dinere Lieblingsnachberin als Opfergab ad Vogelgötter, zum am Glück uf d Sprüng hälfe
☆ Pergament und Schriebmaschine, sötsch der neui Erkänntnis welä für d Nachwält festhalte
☆ Neimaschine und Fade, zum de Strohhuet vom Grossmami z’flicke (Leerziite während em Training sölled schliesslich sinnvoll gnutzt wärde)

Aber nei, jetzt mal im Ernst:

Rein theoretisch sind mir so bombastisch usgrüstet, dass du au spontan nach em Schaffe bi eus chöntsch ineschneie und du bechämtsch vo Pole-Tenue, über Schwitztüechli, Shampoo und Trinkglas alles gstellt, wo du für es tolls Training bruchsch. Wänd aber nöd ganz so zu de flexible, sorte Mänsche ghörsch, nimm doch eifach dini lieblings Polechleider und Grip mit und de Spass chan losgah #yipiii

D’Antwort wo mir dir gern würed geh:

Nei natürli nöd, de Sonderufwand vom “entschmücke” wänd mir dir under keine Umständ atue, schliesslich verbrännsch nacher im Training scho gnueg Kalorie. Am beste behängsch dich also wienen Wiehnachtsbaum, damit jeglichi Videos und Fotis au on fleek sind. So e Pole-Stange kostet ja au nöd alli Wält und isch überhaupt nöd ufwändig zum festschrube. Wenn sie also endlich so richtig tüfi Kratzer dinne het, hani au e ändlich ä super Usred zum minere Kaufsucht nahzgah und Ersatz z’bstelle.

Aber nei, jetzt mal im Ernst:

Klar lit mir de Zuestand vo mine Stange am Herze, aber häsch dir scho mal überleit, was für halsbrecherischi Unfäll chönded passiere, wenn mer sich kopfüber mit Haar und Halsketti verhackt? Ich bin ja en grosse Fan vo Faceplants aber normalerwis luegich die uf Youtube und bevorzuges, wänn die nöd i eusem Studio passiered. Oder häsch der überleit, was passiert wenn dini Pole-Fründin spottisch und ihre din Fingerring id Hut rammsch? D’Möglichkeite und Varianz vo “Tod durch Schmuck” isch unzählig und d’Vorstellig allei de absolut Obergraus. Darum gilt: bi eus vor em Training wird sämtliche Schmuck abzoge.

D’Antwort wo mir dir gern würed geh:

Absolut, schliesslich isch es vo grosser Bedütig vor em Training gnueg Energie zu sich z’neh. So es köstlichs Moité-Moité Fondue het uf 100g doch bestimmt öbe 400 kcal, was scho e beachtlichi Mengi a Energie isch. Wenn jetzt no es halbs Ruchbrot im cremige Chäs wälzisch und das Ganze no miteme feine trockene Wisswi begleitisch, ja denn hesch garantiert gnueg Energie zu dir gno, zum so es 90-minütigs Training durezstah.

Aber nei, jetzt mal im Ernst:

Grundsätzlich halte mir eus mit Ernährigstips zrug und bälled allerhöchstens wänn mer erfahred, dases offesichtlich zwenig gsi isch. Mir sind kei Ernährigsberaterinne aber händ doch au scho di eint oder ander kreativ Essensphase hinder eus. Us eigeter Erfahrig isch es Chäs-Fondue NÖD de optimali Pre-Workout Snack. So gfüllt mit Chäs, denn Kopfüber oder sogar drüllend ade Pole, da wirds eus scho bim Gedanke drah biz andersch. Was mir aber mit Sicherheit säge chönd isch, dass es wichtig isch vor em Trainig gnueg zu sich z’neh demit d’Energie fürs Training langed. Eusi Empfehlig wär also s’Moité-Moité Fondue uf nach em Sport z’verschiebe.

D’Antwort wo mir dir gäbed:

Tatsächlich fallt eus zu dä erste Frag kei ironischi Antwort ih, drum hämmer ä zweiti, sarkastischi dezue dichtet. Du dörfsch theoretisch dini Post zu eusem Studio-Briefchaste umleite lah, du müsstisch en eifach sälber leere. De isch nämlich so inaktiv wienen Briefchaste nur si chan.

Und zu de erste Fag: Yes mam (or sir), als stolzi bsitzendi Person (aka. Bsitzer*in) vomne Humpty oder Birdy Pass häsch du nöd nur zwei fixi Kursplätz, du bechunsch zudem d Möglichkeit bi jedem witere Kurs spontan mitzwschwitze UND dörfsch dezue ane au na is Studio cho, wänns au immer möglich isch.

Es git nur ganz wenig Usnahme, wo s Studio nöd zuegänglich isch. Bispielswis. wenn grad greinigt wird oder en Workshop stattfindet. Also ja, wenn du am drü am Morge als Inhaber*in vom Humpty/Birdy Pass plötzlich under seniler Bettflucht lidisch, dörftisch du dich sehr gern uf de Weg is Studio begeh. S’Einzige wos zbeachte git isch, au wenn s’Studio zu jedere Tages- und Nachtziit für dich zuegänglich isch, settsch du trotz allem uf din Körper und dies Energielevel lose. Denn Regenerationszite nach em Sport ghöred ganz im Name vo de Superkompensation zume gsunde Training dezue.

D’Antwort wo mir dir gern würed geh:

Absolut! D’Andrea hät erst grad gester bim Schriener agfrögt, das er eus 50 hübschi Hängelocker bastled. Bald hät jedes vo eusne Humpty-Vögeli also en Platz für Schue, Chnüschohner, Söcke und Surteigmüettere (wo still vor sich higäred). Vlt gäbeder aber eifach schnell Bscheid wie mer die füttere mues, das si dänn au i eurne Ferieabweseheite überläbed.

Aber nei, jetzt mal im Ernst:

Mir händ chum Platz für all eusi Wunschsportfoltergrät. Au wänn mir na so kreativ würed dänke, würs garantiert nöd für all Sportsäckli vo eusne Schüeler*inne lange. Mir lueged aber, das ihr mit eusne Warm-Ups gnueg Muskelchraft uftrainiered, das ihr euri Sporttäsche möged träge. Isch das en Deal?

D’Antwort wo mir dir gern würed geh:

Ja klar, gar keis Problem, so lang du nett “Bitte” seisch, chönd mir dir sowieso kein Wunsch usschlah. Schliesslich planed mir sowieso nöd witer als bis morn. Ganz nachem Motto “Carpe Diem” – Lebe den Tag und dänk nöd über d’Zuekunft nah, sind eusi Lektione absolut spontan.

Zudem isches völlig irrelevant öb 1 Schülerin meh oder weniger im nächste Zyklus mit debi sind, d’Wirtschaftlichkeit isch bi eus im Studio nume drittrangig und öb mir ändi Monet eusi Rächnige (oder d’Löhn vo de Trainerinne) chönd zahle völlig egal, wil im Notfall zahled mir eusi Mieti mega gern mal mit Hosechnöpf.

Aber nei, jetzt mal im Ernst:

Ihr bechömed vom Sportsnow sogar en Erinnerig, wänn eures Abo verlängered wür wärde. D’Abmelde- und Kündigungsfriste sind izhalte.

Eusi Stunde leited mir ganz nach em Grundsatz “alles dörf, nüt muen”. Mir finded drum es usglichnigs Training generell blöd und die schlächt Siite macht ja eh kei Freud, drumm lömmer die au mega gern mal wäg. Ab Spinning wird’s eus trümmlig, isch also au en Schmarre und trainiere dümmer au nur wils guet usgseht. Da mir ganz nach dene Vorsätz läbed und die Istelig a all eusi Schüelerine witergebed isch au es Dehne nach ere Trainingseinheit nur nötig wän mer halt grad Ziit dezue hät und mer am nächste Tag en Marathon rännt (optional chönder aber i dem Moment au eifach mit me Champagnerglas bitz länger under d’Duschi stah, isch ja au entspannend).

D’Antwort wo mir dir gern würed geh:

Eusi Stunde leited mir ganz nach em Grundsatz “alles dörf, nüt muen”. Mir finded drum es usglichnigs Training generell blöd und die schlächt Siite macht ja eh kei Freud, drumm lömmer die au mega gern mal wäg. Ab Spinning wird’s eus trümmlig, isch also au en Schmarre und trainiere dümmer au nur wils guet usgseht. Da mir ganz nach dene Vorsätz läbed und die Istelig a all eusi Schüelerine witergebed isch au es Dehne nach ere Trainingseinheit nur nötig wän mer halt grad Ziit dezue hät und mer am nächste Tag en Marathon rännt (optional chönder aber i dem Moment au eifach mit me Champagnerglas bitz länger under d’Duschi stah, isch ja au entspannend).

Aber nei, jetzt mal im Ernst:

NEI, IHR DÖRFED S COOL-DOWN NÖD SCHWÄNZE!

D’Antwort wo mir dir gern würed geh:

Ja klar, wenn gnueg Alkohol für all Kursteilnehmer mitnimmsch, fülle mir eus doch grad all zemme d Chappe. Keis Problem – genau für das sind eusi Trainingslektione da.

Aber nei, jetzt mal im Ernst:

Bi eus wird weder unter Alkohol no Drogeifluss traininert und mir würded eus in so Fäll s’Recht useneh die Person an Rand setzte, demit sies ’Training vo usse gnüsse chan anstell vo mitmache.

D’Antwort wo mir dir gern würed geh:

Logisch, da min Vater Physiker isch und ich darum rächt nöch a de Mathematik und de damit verbundene Wahrschinlichkeitsrächnig bin, mach ich jede Morge nach mim erschtä Chai-Tee en chline Wahrschinlichkeitsrächnigs-Rön und gah jedi Schüelerin eimal dure. Dadebi schlüss ich natürlich möglichi Zahnarzttermin, abgmachti Rendez-vous und Kei-Luscht-Afäll us Grund vo Mondstellige us. Das hät zur Folg, dass sich tagtäglich mini Schüelerazahl verändered und mini Täg mal motivierender started oder je nach dem ultimativ grottig. Mir merked aber dur das logischerwis mega früe, das ihr nüme chömed und träged eu automatisch us.

Aber nei, jetzt mal im Ernst:

Grundsätzlich münd alli Abonementskündigunge schriftlich a info(ät)humpty7.ch erfolge (optional dörfed ihr au eifach eures Abo uf Sports-Now künde). Bitte beachted däbi, das ihr das frischtgemäss mindestens zwei Wuche (also 14 Täg, 336 Stunde oder wäners ganz gnau nehmed (waser sötted) 20’160 Minute) bevor dä neu Kurs afangt, mached. Sötted ihr z spat si, sind ihr die glückliche Gwünner vonere witere chostepflichtige Kursperiode. Häschtäg-herzlichigratulation

D’Antwort wo mir dir gern würed geh:

Mir alli wo Administration mached, insbesondere d’Andrea (das isch luschtig will d’Andrea grad z’aller letscht a Magie glaubt), schaffed sehr nöch mitere Kristallchugle zäme. Dur das wüssed mir relativ früe im vorus, wär wänn erschint und chönd dademit de Kursplatz au a öpper anders witer vergeh, obwohl du dich nonig ofiziell abgmulde häsch. Wänn du dich dänn amel glich na rasch mäldisch isch das ultimativ höflich und dä Knigge wär mega stolz uf dich, isch aber eigentlich so gar nöd nötig.

Aber nei, jetzt mal im Ernst:

Alli Stunde wo ihr möchted dörfe nahole müend mindeschtens 4 Stund (also 120 Minute oder wäners ganz gnau nehmed (waser sötted) 7200 Sekunde) im vorus abgmäldet werde via SportsNow. Dademit händ mir d Möglichkeit eure Platz witer z vergeh oder bimne leere Kurs dä Trainerin zahlti Ziit z’schänke, wosi dänn ganz emä Rotwiiglas und erä gfüllte Badwanne chan widme.

D’Antwort wo mir dir gern würed geh:

Natürlich! Näbed em töpfere vo chline Espressotässli wo nöd ganz dicht sind, ghört s’schriebe vo de AGB’s zu mine grosse Liedeschafte, wächsled drum all-pot und sind überhaupt nöd verbindlich. Darum: Au wänns bi eus uf de Internetsiite staht, das das nur 2 Mönet gaht lueged mir da nöd so gnau ane und erwitered eures Gebot vo 4 Mönet uf 10!

Aber nei, jetzt mal im Ernst:

Ordentlich abgmäldeti Lektione (also sottig, woner 4h vor Kursbeginn schriftlich abgmäldet händ) dörfed ihr gemäss AGB’s 2 Mönet lang nahole (insofern ihr no immer Igschriebe sind). Nach dä Kündigung vo eurem Abo müssted ihr eu es bitzli spute, da händer nämlich nur na en Monet Ziit zum nahole.

D’Antwort wo mir dir gern würed geh:

Klar, eusi Abos sind eigentlich ja wienes Stuck Brot. Zack, in Gfrührer und nach de Ferie wieder uftaue unds Produkt isch witerhin gnüssbar. Wänn du eus also din Ferieplan scho mal vorab schicksch, chönd mir dir Empfehlige abgeh, wie du die Abos nach dim wohlverdiente Urlaub chasch uftaue (mir empfehled Umluft bi 191,3 Grad).

Aber nei, jetzt mal im Ernst:

Sönöppis wie «igfrüre” mached mir gemäss AGB’s nöd. Mir sind bi Unfäll und Chrankete wo nöd chönd plant werde und einewäg en unglaublich unagnähm isch, kulant und sueched da mit eu zäme die bescht Lösig. Mit me Arztzügnis ziend mir gfreezedi Zueständ in Erwägig wänns suscht kei anderi Lösige git. Ihr dörfed euri Ferie natürlich so plane, das ihr künded, dänn id Ferie hüpfed und bi de Rückkehr eu wieder amälded. Es chan aber si, das eure Kursplatz i dem Fall wäggschnappt worde isch und ihr drum neui Fründe im ne neue Kurs dörfed sueche. häschtäg-norisknofun?

D’Antwort wo mir dir gern würed geh:

Wie gseit Humpty-Stunde=Stuck Brot. Da du dis Brot ja au chasch usenandschniede und Stückli am Nach-Bär schänke, chan mer sich Abos bi eus au share. Somit chönted ihr eigentlich au e Gruppe vo 7 befründete Persone si und den empfanged mir jedi Wuche öpper anders. Das wär sozege wienes Surprise-Abo und eusi Trainerine hetted ultimativ de Plausch, will mir ja nie gnau wüssted wär chunt. Plus chönted ihr ja i dem Moment mega wo de Erfahrige vo dä andere chönted profitiere. (Bi Surprise-Abos bhalted mir eus eifach vor, die Persone mitere Hampfle Konfetti is Gsicht z begrüesse)

Aber nei, jetzt mal im Ernst:

Ihr dörfed natürlich sehr gern eurem Härzensgspänli en Guetschi für ei Lektion schänke, woner dänn bim nöchste Rächnigserhalt dörf abzie. Für die Guetschilis dörfed ihr eus  es E-Mail schicke und dänn lueged mir, das ihr de so bald als möglich per Post oder Briefüle zuegschickt bechömed. Eusi Abos sind aber asuste Personespezifisch und nöd überträgbar.

D’Antwort wo mir dir gern würed geh:

Wänn ich ganz ehrlich bin isch mis Läbe gsägnet mit Ziit und Langwilig, was mir fählt sind Ufgabe. Drum isch d Iteilig vo mim Tag au eher zweitrangig und das mach ich generell nur, damits chli professioneller usgseht i mim Läbe. Nur scho d Möglichkeit, das öpper chönti zu mir id Privatstund cho isch für mich ä Motivation und wännses dänn halt git, das ich 1 Lektion Ziimmerstund im Studio

han isch das nöd witer schlimm. Ich han ja ä Kafimaschine det und min E-Reader allziit parat. No Problama und liegen ist Frieden und so…

Aber nei, jetzt mal im Ernst:

Privatstunde müend zwingend 24 Stund vorher abgseit oder verschobe werde damit ich mini Ziit möglichst efizient chan nutze und bi dir nöd unnötigi Chöste afalled. Du dörfsch dich natürlich trotzdem witerhin zwei Stund vorher abmälde, dir wird i dem Fall eifach die ganz Privatstund verrächnet werde.

D’Antwort wo mir dir gern würed geh:

Logisch dadezue aber en chline Tipp: Wänd grad dini 99 nöchste Persone mitnimmsch, zahlt jede vo eu nur CHF 1.30 und hett dadefür aber doch jeh 54 ungstörti Sekunde Ufmerksamkeit vo mir oder eini vo de tolle Humpty-Trainerinne. Ihr müssted euri Aligge eifach es birebitzli priorisiere und den halt ultimativ schnell si, aber ganz ehrlich, es Schnäppli wärs!

Aber nei, jetzt mal im Ernst:

Eusi Prise sind underschiedlich, jeh nach dem wie viel Lüt das id Lektion chömed. Söttis jedoch es Thema geh wo du und dini Gspänli wänd öppis drüber lerne, schrieb eus doch es Mail und säg scho mal wär sich amälde würd, je nach dem chönted mer grad en Intensive-Workshop drus mache?

D’Antwort wo mir dir gern würed geh:

Mir läbed da ganz nach em Grundsatz vo “Jede chan mache was er will, will jede staht dezue…blabla”. Darum: Natürlich dörfsch du din verpasste Workshop im ne andere, nöd artverwante, reguläre Kurs nahole. Das isch öppe ähnlich wie wänn dir s Jogurt im Chüelschrank ablauft, bechunsch du schliesslich vom Migros au Quärkli gschänkt über. Mir handhabend das da völlig ähnlich! Zuesätzlich mached mir das mit em Bezahle vo dä Lokalitäte und de Trainerinä eh so à la Mischrächnig und befröged au gern mal d Pinguins im Rapperswiler Zoo öb sich s’ Durefüere vomne Workshop lohnt (schwümmed meh als 3 Pinguin innert 23 Sekunde 3x nach links, lohnts sich, sötted zwei meh als 5 Sekunde tauche nöd). Drum, go with the flow, mir finded ä Lösig!

Aber nei, jetzt mal im Ernst:

Specials und Workshops chönd nöd i normale Lektione nagholt wärde. Dä Aspruch uf e Lektion verfallt bim nöd Erschine an Workshop.

D’Antwort wo mir dir gern würed geh:

Eusi Stunde leited mir ganz nach em Grundsatz “alles dörf, nüt muen”. Mir finded drum es usglichnigs Training generell blöd und die schlächt Siite macht ja eh kei Freud, drumm lömmer die au mega gern mal wäg. Ab Spinning wird’s eus trümmlig, isch also au en Schmarre und trainiere dümmer au nur wils guet usgseht. Da mir ganz nach dene Vorsätz läbed und die Istelig a all eusi Schüelerine witergebed isch au es Dehne nach ere Trainingseinheit nur nötig wän mer halt grad Ziit dezue hät und niemert wet mit eim Schwätze (optional chönder au eifach bitz länger dusche, isch ja au entspannend).

Aber nei, jetzt mal im Ernst:

NEI, IHR DÖRFED S DEHNE NÖD SCHWÄNZE!

Antwort wo mir dir gern würed geh:

Mir sind de Uffassig, das mer sowas wie Frottetüechli nie z’viel ha chan im Läbe und du unbedingt sötsch dur dä nöchst Micasa stifle zum dir es neus Set z chaufe. Du dörfsch die dän au is Training mit neh und eus die stolz präsentiere. Mir nämed eus sehr gern Ziit zum mit dir verschiedeni Stilrichtige z bespräche, lueg aber bitte dases farblich zu dim Trainings-Tenue passt. Das wär sust wie nöd trägbar.

Aber nei, jetzt mal im Ernst:

Du chunsch aber bi eus bi jedem Training es frischgwäschnigs Schwitz-Tüechli und es Putzlümpli über, wo du nach dim Training eus dörfsch id Wösch geh. Söttsch du dir erscht grad dini Haar inere wilde Farb gfärbt ha und dänksch drüber nah bi eus im Studio dini Haar z wäsche und z föne sind mir natürlich dankbar, wänn eusi Tüechli nachene nöd en lichte Buntstich händ. Abgseh vo dem muesch du aber nüt mitneh und mir sind ziemlich usgrüschtet bi eus im Studio.